MY FREIGHTER yuk aviakompaniyasi uchun B757F samolyotining yangi yetkazib berilishi

14-mart kuni mahalliy vaqt bilan soat 16:00 da Orlando (Florida, AQSH) dan MFX7501 reysini amalga oshirayotgan Boeing 757-200F (UK75001) yangi yuk samolyoti Toshkentga yetib keladi. Ushbu samolyot flotimizga muhim qo‘shimcha bo‘ladi va kompaniyaning xalqaro yo‘nalishlarda yuk tashish imkoniyatlarini kuchaytiradi.

Boeing 757F samolyoti eng samarali yuk laynerlaridan biri bo‘lib, yuqori yuk ko‘tarish qobiliyati va qisqa hamda o‘rta yo‘nalishlarda ishlash imkoniyati bilan ajralib turadi. Ushbu bort yuklarni tezroq va tejamkor yetkazib berishga qodir bo‘lib, bu bizga mijozlarga xizmat ko‘rsatish sifatini yaxshilash va xalqaro yuk tashishlarga ortib borayotgan talabni qondirish imkonini beradi.

My Freighter bosh direktori Abdulaziz Abdurahmonov shunday dedi: "Ishonchimiz komilki, ushbu tadbir tashuvlar tarmog‘ini kengaytirish uchun yangi imkoniyatlar ochadi va aviakompaniyaning raqobatbardoshligini oshiradi. Yangi zamonaviy havo kemalarini joriy etish kompaniyaning logistika yechimlarini takomillashtirish va butun dunyo bo‘ylab hamkorlarimizga xizmat ko‘rsatish strategiyasida muhim qadamdir."

Yangi bort yaqin vaqt ichida parvozlarni amalga oshirishni boshlashi va aviakompaniyamizning xalqaro yuk aviatashuvlari bozoridagi mavqeini yanada mustahkamlashi kutilmoqda.