Markaziy Osiyoning eng yirik yuk tashuvchisi "MY FREIGHTER" navbatdagi Boeing 767 samolyoti bilan o‘z flotini kengaytirmoqda

Toshkent, 2024-yil 11-dekabr — O‘zbekistonning MY FREIGHTER yuk tashish operatori o‘z flotiga navbatdagi Boeing 767 yuk tashuvchi havo kemasini qo‘shganini e’lon qildi. UK67019 raqami bilan ro‘yxatdan o‘tkazilgan yangi samolyot kompaniya parkidagi oltinchi samolyot bo‘ladi.

Boeing 767-300F zamonaviy, yuqori samarali yuk tashuvchi havo kemasi bo‘lib, qit’alararo yo‘nalishlarda 58 tonnagacha tijorat yukini tashiy oladi. Samolyot ilg‘or navigatsiya tizimlari va yoqilg‘i tejaydigan dvigatellar bilan jihozlangan, bu esa uni xalqaro logistika zanjirining muhim bo‘g‘iniga aylantiradi.

Yangi havo kemasining birinchi tijoriy parvozi dekabr oyida amalga oshiriladi. 11-dekabr kuni samolyot Uilmington (ILN) aeroportidan soat 17:00 da uchib chiqib, Lej (LGG) aeroportiga ertasi kuni soat 03:30 da yetib bordi va MFX7601 reysini bajardi. 12-dekabr kuni esa, samolyot Lejdan (LGG) soat 05:30 da uchib, MFX7662 reysini amalga oshiradi va Toshkentga (TAS) 12:30 da (UTC bo‘yicha) qo‘nadi. Shunday qilib, MY FREIGHTER ro‘yxatidan o‘tgan holda faoliyatini boshladi va yangi layner o‘zining birinchi parvozini amalga oshirdi.

MY FREIGHTER bosh direktori Abdulaziz Abdurahmonov quyidagicha fikr bildirdi:

"Yangi Boeing 767-300F samolyotining foydalanishga topshirilishi Markaziy Osiyoda yuk tashish aviatsiyasi sohasidagi yetakchilik o‘rnimizni mustahkamlash strategiyamizni amalga oshirishda muhim bosqich hisoblanadi. Ushbu havo kemasi yuk aylanmasini sezilarli darajada ko‘paytirish, yetkazib berish muddatlarini qisqartirish va mijozlarga keng ko‘lamli logistika yechimlarini taklif etish imkonini beradi.

Biz eng yuqori darajadagi xizmat ko‘rsatishni ta’minlash uchun texnologik innovatsiyalar, infratuzilmani modernizatsiya qilish va flotlarimizni kengaytirishga sarmoya kiritishda davom etamiz".