My Freighter Vyetnam/Tailand – Toshkent – Frankfurt xalqaro yuk yo‘nalishini ochmoqda

My Freighter xususiy yuk aviakompaniyasi Janubi-Sharqiy Osiyo, Markaziy Osiyo va Yevropani bog‘lovchi yangi muntazam yo‘nalish ishga tushirilganini e’lon qiladi.

Kelasi yakshanbadan aviakompaniya quyidagi yo‘nalishlar bo‘yicha reyslarni yo‘lga qo‘yadi:

• Xanoy – Toshkent – Frankfurt; 

• Bangkok – Toshkent – Frankfurt;

• Olmaota – Toshkent – Frankfurt;

• Toshkent – Frankfurt.

Parvozlar haftasiga ikki marta, juma va yakshanba kunlari keng fyuzelyajli Boeing 767-300 yuk samolyotlarida amalga oshiriladi.

Yangi yo‘nalishning ishga tushirilishi mintaqalararo logistika imkoniyatlarini sezilarli darajada kengaytirib, Osiyo va Yevropaning asosiy bozori o‘rtasida barqaror transport aloqasini shakllantiradi.

Yangi reyslar quyidagi maqsadlarga xizmat qiladi:

•      O‘zbekistondan Janubi-Sharqiy Osiyo mamlakatlariga eksport yetkazib berishni rivojlantirish;

•      Vyetnam va Tailanddan Markaziy Osiyoga yuk oqimini oshirish;

•      O‘zbekistondan Yevropaga eksport kanallarini kengaytirish;

•      Osiyo mamlakatlari va Yevropa bozorlari o‘rtasida samarali tranzit yechimlarini shakllantirish.

Toshkent ushbu yo‘nalish doirasida muhim tranzit xabi vazifasini o‘tab, mintaqalararo yuklarni konsolidatsiya qilish va qayta taqsimlashni ta’minlaydi.

Yangi yo‘nalish My Freighter kompaniyasining xalqaro yo‘nalishlar tarmog‘ini rivojlantirish hamda O‘zbekistonning Osiyo va Yevropa o‘rtasidagi asosiy logistika markazi sifatidagi rolini mustahkamlash strategiyasining bir qismidir.

Aviakompaniya parvozlar geografiyasini kengaytirishni davom ettirib, samarali va ishonchli yuk tashuvlarini ta’minlashga qaratilgan yangi logistik yechimlarni amalga joriy qilmoqda.