My Freighter yangi interlayn shartnomalarini imzolash orqali Xitoydagi hamkorlik tarmog'ini kengaytirmoqda

O‘zbekistonning eng yirik My Freighter yuk aviakompaniyasi Xitoy aviakompaniyalari bilan Xitoy, Markaziy Osiyo va asosiy global bozorlar o‘rtasidagi yuk tashish tarmog‘ini rivojlantirish hamda logistika samaradorligini oshirishga qaratilgan bir qator interlayn kelishuvlarni imzolaganini e’lon qildi. 

Xitoyning eng yirik ixtisoslashgan yuk aviakompaniyasi — SF Airlines kompaniyaning asosiy hamkoriga aylandi. Ushbu aviakompaniya 90 ta yuk samolyotidan iborat flotni boshqaradi va Ezhou (EHU), Shenchjen (SZX) hamda Gonkong (HKG)dagi asosiy xablardan parvozlarni amalga oshiradi.

Shuningdek, Xitoyning Loong Air (Hangjouda joylashgan, HGH) va Juneyao Air (Shanxay, PVG va SHA aeroportlari) yo‘lovchi aviakompaniyalari bilan ham imzolangan interlayn kelishuvlar Xitoy ichki va xalqaro yo‘nalishlarida yuklarni tashish hamda tranzit imkoniyatlarini kengaytiradi.

Bundan tashqari, My Freighter Tayvanning STARLUX Airlines aviakompaniyasini ham hamkor sifatida jalb qildi. Ushbu aviakompaniya Taybey (TPE)dan Janubi-Sharqiy Osiyo, Yaponiya va AQSh yo‘nalishlarida parvozlarni amalga oshiradi.

Yangi kelishuvlar yuk tashish geografiyasini sezilarli darajada kengaytirish, yanada moslashuvchan logistika yechimlarini taqdim etish hamda Xitoy, Markaziy Osiyo, Yevropa va boshqa xalqaro bozorlar o‘rtasida yuk yetkazib berish tezligini oshirish imkonini taqdim etadi.

Osiyodagi hamkorlikni kengaytirish My Freighter’ning xalqaro sheriklik tarmog‘ini rivojlantirishga qaratilgan global strategiyasining bir qismidir. Avvalroq aviakompaniya Cargojet (Kanada), Air Serbia, National Air Cargo va American Airlines (AQSh), Biman Bangladesh Airlines (Bangladesh), Aeromexico (Meksika), Air Europa (Ispaniya), Challenge Group va Icelandair Cargo (Islandiya) kabi yetakchi tashuvchilar bilan interlayn kelishuvlar tuzgan edi.

My Freighter kelgusida ham dunyoning muhim mintaqalarida hamkorlikni kengaytirib, transport imkoniyatlarini oshirish va mijozlarga xalqaro logistika bo‘yicha samarali yechimlar taklif qilishda davom etadi.