My Freighter aviaparki Zahiriddin Muhammad Bobur nomi berilgan Boeing 767-300F bilan kengaydi

Centrum Holding tarkibiga kiruvchi My Freighter yuk aviakompaniyasi o‘z parkini bort raqami UK67023 bo‘lgan navbatdagi Boeing 767-300F samolyoti bilan kengaytirdi. Ushbu samolyot kompaniya parkidagi o‘ninchi Boeing 767 bo‘ldi va aviakompaniyaning jami havo kemalari soni o‘n bittaga yetdi.

Samolyotga Andijonda tavallud topgan shoir, davlat arbobi va Boburiylar saltanati asoschisi Zahiriddin Muhammad Bobur nomi berildi.

Besh asrdan ko‘proq vaqt avval Bobur o‘z faoliyati orqali Markaziy Osiyoni dunyoning olis o‘lkalari bilan bog‘lagan edi. Bugun uning nomini olgan samolyot O‘zbekistonni jahon bozorlari bilan bog‘lash orqali ushbu tarixiy merosni davom ettirmoqda.

Boeing 767-300F kompaniyaning yuk tashish salohiyatini oshirib, mijozlarga yuk tashishni tashkil etishda kengroq imkoniyat va qulayliklar yaratadi.

Yangi samolyot quyidagi imkoniyatlarni taqdim etadi:

Qit’alararo yo‘nalishlarda 55 tonnagacha yuk tashish;

O‘zbekistonga yuk import qilish va mamlakatdan eksport qilish imkoniyatlarini kengaytirish;

Toshkent xabi orqali Yevropa va Osiyo o‘rtasidagi yuk tashish aloqalarini mustahkamlash;

Murakkablashib borayotgan logistika zanjirlarining uzluksiz ishlashi uchun ishonchli yuk tashish imkoniyatlarini yaratish.

Har bir yangi samolyot My Freighterning Markaziy Osiyoni mijozlar va hamkorlar uchun muhim bo‘lgan xalqaro bozorlar bilan bog‘lash imkoniyatlarini yanada kengaytiradi.

Boeing 767-300F aviakompaniyaning xalqaro yuk tashish tarmog‘iga qo‘shilib, mavjud va yangi yo‘nalishlarda yuk tashish imkoniyatlarini kengaytirmoqda.