My Freighter sakkizinchi yuk samolyotini qabul qilib oldi — Boeing 767-300F

My Freighter aviakompaniyasi yuk floti salohiyatini kengaytirishda davom etmoqda: parkka 67020 bort raqamini olgan sakkizinchi samolyot — keng fyuzelyajli Boeing 767-300F qo‘shildi. 

Havo kemasi Uilmington (Ogayo shtati, AQSH) – Ostrava (Chexiya) – Toshkent (O‘zbekiston) yo‘nalishi bo‘yicha parvozni amalga oshirgan holda 3-may kuni Toshkent xalqaro aeroportiga yetib keldi. Yangi samolyot aviakompaniya parkidagi yettinchi Boeing 767 boʻldi. Flot tarkibida, shuningdek, bitta Boeing 757-200F ham mavjud.

"My Freighter flotini kengaytirish — xalqaro yuk tashish bozoridagi oʻrnimizni mustahkamlashga qaratilgan uzoq muddatli strategiyaning bir qismidir. Butun dunyo bo‘ylab maksimal moslashuvchanlik va tez yetkazib berishni ta’minlashga intilmoqdamiz. Keng fyuzelyajli samolyotlar sonining ortishi esa bu boradagi muhim qadamlardan biridir", — deya izoh berdi aviakompaniya matbuot xizmati.

Bugungi kunda My Freighter — O‘zbekistonning eng yirik yuk tashuvchi aviakompaniyasi bo‘lib, mintaqaviy va uzoq masofali yo‘nalishlarda jadal faoliyat olib bormoqda.